ការចែកខ្លួននៃ DNA
ជាធម្មតា DNAអាចបង្កើតខ្លួនដោយខ្លួនឯង ដោយ DNA មួយអាចចែកខ្លួនវាជា ពីរខ្សែ ដែលខ្សែនីមួយៗដើរតួនាទីជាគំរូសម្រាប់ចម្លងខ្សែអង្កត់ថ្មីទៀត។ ហើយខ្សែ DNAនីមួយៗត្រូវបានចម្លងដោយមានសម្ព័ន្ធអ៊ីដ្រូសែនស្ថិតនៅរវាងគូបាសដែលមានវត្តមានក្នុង Double Helix។ ជាលទ្ធផល DNA ថ្មីពីរខ្សែត្រូវបានបង្កើតឡើង ដែលមានមួយខ្សែជាខ្សែអង្កត់ដើម និងខ្សែមួយទៀតជាខ្សែអង្កត់ថ្មី។
របៀបនៃការចម្លងនៃខ្សែ DNA នេះគេឲ្យឈ្មោះថា Semiconservative ដែលជាគន្លឹះសំខាន់ក្នុងការបន្តពូជប្រកបដោយស្ថេរភាព។
លក្ខណៈសម្បត្តិសំខាន់នៃ DNA នេះគឺវាមានស្ថេរភាពខ្ពស់ ដែលអនុញ្ញាតឲ្យដើរតួជាគំរូសម្រាប់ការចម្លងនៃ DNA ថ្មីក៏ដូចជាសម្រាប់ការបកប្រែក្រមពាក់ព័ន្ធជាមួយម៉ូលេគុល RNA។ ផ្នែកមួយនៃ DNAដែលសរសេរកូដសម្រាប់ការសំយោគកោសិកានៃប្រូតេអ៊ីនជាក់លាក់មួយត្រូវបានគេហៅថា ហ្សែន (Gene)។
និយមន័យ “ហ្សែន“
ពាក្យថា ហ្សែន (Gene) នេះ គេតែងតែសំដៅទៅលើ លក្ខណៈមូលដ្ឋាននៃការតំណពូជ ដែលទទួលបានពី ឪពុក ម្តាយ ទៅកូន រួមមានការស្តុកទុកនូវព័ត៌មានចាំបាច់ទាក់ទងនឹង ផ្នែករូបរាង និងជីវសាស្ត្រ។
ហ្សែន ត្រូវបានសាងសង់ឡើងដោយផ្នែកតូចៗនៃ DNA ដែលស្ថិតនៅក្នុងចំណែកមួយនៃក្រូម៉ូសូម។
